மந்தையாய் வாழ்ந்த
எந்தையர் வாழ்வில்
விந்தைகள் புரிந்து
சிந்தையை கவர்ந்த எங்கள்
சிந்தனை சிற்பி
தலையெழுத்தை தலைகீழாய் எழுதிவிட்ட ஆண்டவனே
தந்துவிடு நல்வாழ்வை எமக்கு!-'தங்கத்
தலைவரினை' இழந்துவிட்டு தவிக்கின்ற 'எம்சமூகம்'
தலையிழந்து முண்டமெனக் கிடக்கு!
தலைவர்நாம் என்றவர்கள் தறுதலைகள் முன்னாலே
தலைகவிழ்ந்து நிற்கின்றார் எதற்கு-?அவர்
தலையாட்டி பொம்மைகள்போல் தனித்துவத்தை விட்டுவிடின்
தருவாரே சிலஎலும்பு அதற்கு!
தலையில்லாத் தலைகளினை தலைவரென நினைத்ததற்காய்
தலையிடிதான் எங்களுக்குப் பரிசு!-பதவிக்காய்
தலைசொறிந்து பல்லிளிக்கும் தலைவர்களால்
தடுமாறும் எம்வாழ்க்கை தரிசு!
தலைதடவி கண்களிலே கண்கெட்டோர் கைவைக்க
தலையணையில் எம்தலைகள் இருக்கு!-தங்கள்
தலைதப்பி னால்போதும் என்கின்ற கோழையரை
தேர்ந்தெடுத்த நாங்கள்தான் கிறுக்கு!
தலைப்பிறையை மேகத்தால் தகர்த்தெறிய முடியாது
தலைவர்களே கொண்டிடுவீர் ஒப்பு!-உங்கள்
தலைகளினை காப்பாற்ற கண்ணிருந்தும் குருடர்களாய்
தவறுகளை பார்த்திருத்தல் தப்பு!
தலையில்லா முண்டங்களாய் மாறிவிட்ட எம்மவர்க்கு
தலையாக ஒருதலைவன் எழுவான்!-அவன்
தலைவரவர் சுவடுகளில் தயங்காமல் நிதம்நடக்க
தளையொடிந்து சிரிக்குமெங்கள் எழுவான்!!
இதை நீங்கள்
வது நபராக வாசிக்கிறீர்கள்
1 கருத்து:
எழுவான் எழுவானென
எழுந்திடாமல் இருந்துமென்ன
துன்பம் என்றும் துயரமென்றும்
தொழுது நிதம் துதித்துமென்ன
அவர்களுக்கென்றும் இவர்களுக்கென்றும்
ஏங்கித்தினம் இருந்துமென்ன
நாங்களும் நீங்களுமே
நாமென்று ஆகிவிட்டால்
எழுவான் திசையினில்
புதிதாய் எழுந்திடலாமே
வானதி சந்ரா(விரிவுரையாளர்)
யாழ்.பல்கலைக்கழகம்.
கருத்துரையிடுக